കോയമ്പത്തൂര്‍: കവര്‍ച്ച കേസിലെ പ്രതികളെ പൊലീസ് വെടിവെച്ച് കീഴ്‌പ്പെടുത്തി. കൗണ്ടംപാളയം ഹൗസിങ് യൂണിറ്റിലുള്ള 13 വീടുകളില്‍ നിന്നായി 56 പവന്‍ സ്വര്‍ണാഭരണങ്ങളും, 3 കിലോ വെള്ളിയും മൂന്ന് ലക്ഷം രൂപയും കവര്‍ന്ന കേസിലെ പ്രതികളെയാണ് പൊലീസ് വെടിവെച്ച് കീഴ്‌പ്പെടുത്തിയത്. ഉത്തര്‍പ്രദേശ് സ്വദേശികളായ ആസിഫ്(48), ഇര്‍ഫാന്‍(45), ആരിഫ് ഗ്വാജിവാല(60) എന്നിവരെയാണ് പൊലീസ് പിടികൂടിയത്.
ശനിയാഴ്ച്ച രാവിലെ തിരുനഗറില്‍ വച്ചാണ് പൊലീസ് പ്രതികളെ പിടികൂടിയത്. വെടിയേറ്റ മൂവരെയും കോയമ്പത്തൂര്‍ സര്‍ക്കാര്‍ മെഡിക്കല്‍ കോളേജില്‍ പ്രവേശിപ്പിച്ചിരിക്കുകയാണ്. വെള്ളിയാഴ്ച്ച പകലാണ് ഓട്ടോറിക്ഷയില്‍ എത്തിയ സംഘം വീടുകളുടെ വാതില്‍ പൊളിച്ച് അകത്ത് കടന്ന് മോഷണം നടത്തിയത്. സര്‍ക്കാര്‍ ഉദ്യോഗസ്ഥര്‍ താമസിക്കുന്ന ആയിരം വീടുകളോളമുള്ള ഹൗസിങ് യൂണിറ്റിലായിരുന്നു സംഭവം.
Content Highlight; Coimbatore police open fire on robbers involved in gold theft